Владата на денешната владина седница ја одобрила стратешка инвестиција во ски-центарот Попова Шапка, информираше Министерството за животна средина и просторно планирање. Според информацијата станува збор за стратешко партнерство со ски-центарот Попова Шапка со вкупна вредност од 186 милиони евра, од италијанската фирма Техно Алпин.
Инвестицијата треба да се реализира почнувајќи од 2023 година и ќе се реализира во 6 инвестициски фази од кои првата изнесува приближно 55 милиона евра.
-Вклучува реновирање на постојните капацитети, поставување на систем за правење снег, проширување на постојната скијачка зона со нови објекти и патеки, реновирање и проширување на хотелите, изградба на нови хотелски капацитети, изградба на асфалтни паркиралишта, велосипедски патеки и креирање на други рекреативни активности, со што овој центар ќе доби можност да се вброи во најмодерните европски зимски центри, се вели во информацијата од Министерството.
Фирмата Техно Алпин работи на производство и инсталирање на системи за вештачки снег, дизајн на скијачки терени и скијачки зони и има 600 вработени.
-Оваа компанија, по направеното истражување, понуди амбициозен план за развој, иновации и раст на ски-центарот Попова Шапка кој се карактеризира со модернизација на постоечката ски зона и нејзино територијално проширување, подобрување на примарната инфраструктура неоходна за развој на областа, со квантитативни и квалитативно подобрување на туристичко сместувачката дејност, со вклучување на нови капацитети за прилагодување на туристичката понуда на актуелните барања на туристичкиот пазар и проширување на истата, соопштија од Министерството.
