Министерот за дигитална трансформација, Стефан Андоновски и градоначалникот на Општина Јегуновце, Димитар Костадиноски потпишаа меморандум за соработка со цел отворање на административна канцеларија за услуги за граѓаните во Општина Јегуновце „Една точка за услуги“ (ЕТУ).
Со канцеларијата, ќе се обезбеди можност за добивање на уверение за државјанство; уверение за податоци за стажот на осигурување; образец м1/м2 од пријава/одјава во задолжително социјално осигурување; историјат на работни односи; потврда дека не е изречена прекршочна санкција забрана за вршење на професија, дејност или должност; податоци на физички лица од кредитниот регистар и други.
„Во Општина Јегуновце и околината гравитираат околу 10.000 жители, кои ќе имаат директен корист од оваа канцеларија. Во соработка со општината, со новата канцеларија, ќе обезбедиме брз и ефикасен пристап до сите важни административни услуги за граѓаните на оваа и соседните општини, што значително ќе го подобри квалитетот на живот и ќе го олесни секојдневното функционирање на сите жители. Според извештајот на Државниот завод за ревизија, овие канцеларии издале многу малку документи. За една година се издадени само 1.062 документи, а во Тетово само 7 граѓани месечно ги користеле услугите. Со новите канцеларии, трошоците се оптимизираат, а услугите се доближуваат до граѓаните. Нашата визија е Македонија да стане лидер во дигиталната трансформација на Балканот, а придобивките да ги почувствува секој човек, секој град и секое село во државата“, истакна министерот Андоновски.
Градоначалникот Костадиноски рече дека канцеларијата ќе биде од голема корист за граѓаните кои нема да имаат потреба да патуваат до Тетово односно ќе може да добијат административна услуга во својата општина.
„Ова да биде пример и во иднина и до другите ресорни министерства и другите надлежни институции да продолжат да го следат примерот на Министерството за дигитализација, односно министерот Стефан кој се заложи за многу кратко време да најдеме заеднички јазик, да ја отвориме оваа канцеларија. Да биде пример, да граѓаните ги имаат што поблиску институциите и да им се решаваат дневните проблеми што поедноставно и побрзо“, истакна Димитар Костадиноски.
Министерот Андоновски најави дека се прават конкретни напори за подобрување на перформансите и на канцелариите „Една точка за услуги“, кои беа отворени во Скопје, Куманово, Охрид, Битола.
ас