Средното училиште Спортска Академија Тетово информира дека во понеделник 15 мај ќе се вршат уписи и селекција на заинтересирани ученици од основните училишта. Уписите и селекцијата ќе се вршат на теренот со вештачка трева на Спортскиот центар во Тетово со почеток од 9 часот.
-Учениците во ова училиште стекнуваат четиригодишно гимназиско образование. Стимулирани се со бесплатна спортска опрема од Фудбалската федерација која им е потребна за тренинзите, бесплатни учебници од МОН, бесплатен превоз и стипендија од 550 евра годишно доколку остварат просек од 4.0. Со растот на стандардот расте и висината на стипендијата, информираа од училиштето.
Државното средно училиште Спортска академија -Тетово, функционира како дисперзирана паралелка под ингеренција на Спортската академија од Скопје веќе седма година во континуитет.
-Во Тетово ова државно средно училиште е лоцирано во објектот на гимназијата „Кирил Пејчиновиќ“ кај Архивот, каде наставата на учениците се одвива во попладневните часови, додека практичниот дел учениците го имаат на теренот со вештачка трева на Спортски центар каде учениците ги совладуваат вештините по предметот Тренинг на фудбал.
Тренинзите односно практичниот дел е раководен од лиценцирани тренери од ФФМ и од професори по физичко образование или ментори кои спроведуваат и дел од теоретската настава по стручни предмети, во склоп на теоретските наставни часови во училиштето. Наставата има од прва до четврта година на македонски и на албански паралелки.
По завршувањето на четиригодишното образование, учениците можат да се запишат на секој факултет по нивна желба. Целта на ова училиште е да се пропагира образованието и спортот како една перспективна целина која од младите генерации ќе прозведе здрави психофизички личности со одличен степен на теоретско образование но и здобивање со спортски вештини по фудбал од каде може да излезат успешни реализирани спортисти, фудбалери и фудбалерки кои по својот квалитет може да парираат на европските но и на светските професионалци од овој спорт.
Многу ученици од ова училиште се успешни студенти запишани на различни факултети во државава, а дел од нив се успешни репрезентативци кои играат за нашите познати клубови но и клубовите во регионот и во странство.
