Во пресрет на претстојниот празник Рамазан Бајрам кога се очекува зголемена сообраќајна динамика на подрачјето, СВР Тетово уште еднаш со апел до возачите да ја прилагодат брзината според условите на патот, односно да не возат пребрзо и целосно да се придржуваат на сите сообраќајни правила и прописи, а посебно на оние кои се однесуваат на престигнување, давање првенство, држење безбедно растојание и друго, за да се избегнат мешаници и несреќи. Ова, дотолку повеќе што деновиве забележително зголемен е бројот на возилата кои сообраќаат по градските улици во Тетово и Гостивар, но и по регионалните и локалните патишта.
Засилените сообраќајно-контролни активности на тетовско-гостиварското подрачје продолжуваат во континуитет. Вчера (18 април) од 7 до 13 часот спроведена е уште една акциска контрола за брзина со која се движат возилата, претежно на автопатот Гостивар-Тетово-Скопје и околните регионални патишта, во која биле откриени и санкционирани вкупно 49 пречекорувања на максимално дозволената брзина надвор од населено место (ТЕ-30 и ГВ-19). Едно од пречекорувањата (ГВ) било за над 70 километри на час, 12 (ТЕ-4 и ГВ-8) до 70 километри на час и така натаму. Покрај ова, санкционирани се и 11 пречекорувања на пропишаната брзина (ТЕ) во населено место, како и 2 други видови прекршоци (ТЕ-1 и ГВ-1). На сите прекршители изготвени им се соодветни поднесоци и тие ќе се соочат со парични глоби од 10 до 400 евра во денарска противвредност, зависно од големината на пречекорувањето, а значително брзите возачи и со времено одземање на нивните возачки дозволи од три месеци до една година.
