Денеска на пладне, под ”раководната палка” на тренерот Ивица Радоњиќ, актуелниот македонски шампион и есенски лидер ЖФК Љуботен ги започна подготовките за пролетниот дел.
На првиот работен состанок раководството на тимот Драгољуб Јовановски, Перо Јовановски и Ивица Богдановски порачаа дека главна цел е одбрана на шампионскиот трон, кој носи нова шанса за излез во Европа, поточно во Лигата на Шампионите.
-Во однос на играчкиот кадар кој ја освои есенската титула, единствено ќе недостасува Сања Ратковиќ која кариерата ја продолжи во Полска. Но затоа раководството експресно реагира и веќе го најави првиот трансфер во името на Бојана Петкова, а до крај на преодниот рок актуелниот шампион ќе биде посилен за уште една до две домашни репрезентативки како и едно странско засилување со кој веруваат дека заедно ќе го изодат шампионскиот пат, информираше Радоњиќ.
Екипата ќе одигра четири до пет контролни натпревари, дел домашни и неколку меѓународни. На 1-ви февруари Љуботенки ќе гостуваат во соседна Србија, во Ниш на дуел со екипата на ЖФК Машинац, а на 8-ми домаќини на КФФ Митровица од Косово. На 11-ти февруари актуелниот македонски шампион ќе се ”тестира” против сениорската репрезентација на Македонија.