По едногодишна пауза планинарскиот клуб Јелак од Тетово најавува дека в недела ќе се изведе ноќното искачување на врвот Љуботен на Шар Планина со цел да се дочека изгревањето на сонцето. Минатата година поради пожарите, забраните за движење во шума и временските услови овој настан не беше организиран. Ова е шесто искачување насловено „Зора на Љуботен“.
-Самиот настан почнува на 16 септември, сабота со собирање на учесниците на градскиот плоштад во Тетово, поточно пред Домот на културата. Планот е да се тргне од Тетово во 20:30 часот и да се упатиме кон Старо Село, каде што ќе ги зачекаме учесниците од другите места. После прибирањето во 21:30 часот ќе тргнеме нагоре накај планинарскиот дом Љуботен (1.650 мнв), што ќе ни биде база за понатамошно качување, информира Владимир Трповски од ПК Јелак.
Планираното стигнување во планинарски дом Љуботен каде ќе биде поставен базниот камп е околу 23:30-24:00 часот.
-Таму е предвиден поголем одмор, имаме доволно време за вечера и разноразни активности пред понатамошното искачување.Во поход на самиот врв тргнуваме некаде околу 02:00-02:30 часот на 17.09, недела, а на самиот врв да стигнеме околу 04:30 – 05:00 часот за да го дочекаме самото изгрејсонце. Дадени се пошироки рамки заради тоа што се работи за ноќно искачување каде што е потребна поголема претпазливост и внимание на учесниците, потенцира Трповски.
Од планинарскиот клуб порачуваат учесниците да имаат стандардната планинарска опрема, челна или рачна ламба.
-Пожелно е на облеката или опремата да има ознаки од рефлектирачки материјал заради подобро следење на колоната, удобни планинарски чевли или чизми, со потопол слој на облека, бидејќи горе на самиот врв ќе се задржиме повеќе од два часа, а утрата на таа висина се секогаш ладни.
Пожелно е, кој има да си понесе подлога за седнување, бидејќи седењето на камења не е баш премногу удобно. Не е лошо и да се има и вреќа за спиење, за заштита додека да го чекаме изгрејсонцето, порача Трпковски.
Љуботен е врвот со кој започнува Шар Планина, висок е 2.499 метри надморска височина.
ас