Ерик Мартин Нилсон од Шведска од Попова Шапка до Титов Врв и назад истрча за 2 часа 11 минути и 22 секунди со што за осум минути го собори досегашниот рекорд на Дејан Ангелески од Охрид. Ова е најдобриот резултат од 95 учесници на шестото издание на „Титов Врв скајрејс“ што вчера се одржуваше на релација Попова Шапка-Титов Врв-Попова Шапка.
Македонскиот натпреварувач Сашо Богојевски го освои второто место со време од 2:36:14, а трет беше Јохан Давид Сундсторм од Шведска со време од 2:48:26.
Македонската натпреварувачка Елена Ртоска делницата ја помина за 2 часа 58 минути и 47 секунди со што го „урна“ сопствениот рекорд од 2023 година и за прв пат истрча под три часа. Второ место освои Магдалена Вјоцка од Полска (3:48:28), додека третото место Ивана Пекевска (3:50:43)
Со оглед на повеќето постигнати рекорди од планинарскиот клуб Македон кои се организатори на трката велат дека ова шесто издание може да се прогласи за најуспешно.
„Одиме напред од година в година. Со самото тоа што годинава имавме 110 пријавени, што платиле котизација да учествуваат, иако некои од оправдани причини не тргнале, меѓутоа имаме најголем број на учесници досега. Нешто што за ваков тип на трка е за почит. Ова не се обични трки, туку сериозни трки, самото движење до Титов Врв по таа зимска патека и спуштање е предизвик, не е едноставна и лесна. Трката од оваа година го има сертификатот од Светската скај-ранинг федерација. Привлече тоа повеќе странски натпреварувачи. Тоа е добро и за промоција на самиот национален парк Шар Планина. За овие два дена околу 300 луѓе имаше на престој таму. Имавме помош и логистика од ренџерите од НП ,,Шар Планина“, изјави Душко Петрушевски, претседател на ПК Македон и директор на трката.
За македонските натпреварувачи оваа трка претставува и државно првенство.
„Трката се организира на терминот соодветен пред светско и европско првенство, годинава за разлика од пред две години имавме добро време. Оваа година Светско првенство е во Шпанија во септември и даде прилика да не биде во мај кога има и лошо време, туку во јули со потопло време и идеални услови за организација и одржување. Имавме преку 30 волонтери и долж патеката кои помагаа на тркачите и беа логистика на трката, истакна Петрушевски.
На шестото издание „Титов Врв скајрејс“, имаше 110 пријавени, трката ја почнале 95, а ја завршиле 89 учесници.
фото ПК Македон