Профеосори од Регионалниот центар за стручно образование и обука „Моша Пијаде“ од Тетово од 25 до 27 октомври учествуваа на четвртата мобилност на Еразмус+ проектот Од мисли до кодови (From Thoughts to codes) во Повоа де Варзим, Португалија.
-Домаќин на настанот беше Escola Secundária de Rocha Peixoto – Póvoa de Varzim , кое е на неколку километри од Порто на брегот на Атланскиот Океан. Координатор на проектот е училиште од Грција, а партнерски училишта се нашето училиште и училишта од Романија, Италија и Турција. Наставниците имаа можност да споделат добри практики од областа на програмирање и роботика преку употреба на апликации како Appinventor и Scratch, како и употребата на плочата Arduino преку Makey Makey во Fábrica Centro Ciéncia Viva-научен центар. Исто така домаќинот организираше работилница за кодирање каде ученици од училиштето имаа задача да помагаат на наставниците, информира координаторката на проектот Виолета Србиновска.
Професорите од „Моша Пијаде“ имаа и посета и работилница на Универзитетот во Авеиро во одделот за роботика каде беа научени некои истражувачки концепти за програмирање на роботи кои симулираат човечки активности-роботите играат фудбал. Воедно ги посетија и културно историските знаменитости на земјата домаќин, односно значајни места во Повоа де Варзим и Порто.
