Здружението на Срби и Македонци „Бранко Чајка“ од Тетово“ вчера вечер ги заокружи своите активности поврзани со одбележувањето на триесет годишниот јубилеј со промоција на монографија за своите активности во изминатите три децении.
Присутните на промоцијата имаат можност преку видео приказ визуелно да проследат дел од активностите кои се спровеле во 30-те години постоење кои се евидентирани во монографијата. За публикацијата пригодно обраќање одржа Милутин Станчиќ, од Српскиот информативно-културен центар во Скопје.
-Ова здружение покажува како може да му се пркоси на едно време и со својата истрајност и масовност го покажа капацитетот за да достигнува резултати. Монографијата е на 50-тина страници, со фотографии и текст, имаме голем број имиња на луѓе чии потписи се на многу договори и така прецизно е показател на времето позади нас. За мене голем исчекор за Здружението е што пред десет години започна манифестацијата „Пишуваме и твориме на српски јазик“ која можам да кажам дека ги надминува и капацитетите на редовната настава, истакна во обраќањето Милутин Станчиќ.
Претседателката на Здружението Соња Андонов воедно е авторка на монографијата.
-Создавањето на оваа монографија истовремено претставуваше и лесна, но и тешка работа. Лесна, затоа што пред себе имав мошне обемен материјал – фотографии, извештаи, разговори, документи, написи. Но, од друга страна сепак беше тешко во смисла – што од сето тоа да се избере најзначајното и да се стави помеѓу кориците, а да не биде изоставено. При оформувањето на монографијата, самиот вид на делото наложуваше да бидат применети методите на дескрипција, историска метода и метода на интервјуирање и тоа индивидуално и слободно интервју, порача на промоцијата Соња Андонов.
Таа потсети дека главната активност на Здружението е фолклорот кому му е посветен посебен дел во монографијата.
-Тука е наведено неговото формирање, настапите, постигнатите успеси, наведени се имињата на кореографите, вокалните солисти, членовите на оркестарот и играорците. Тука морам да истакнам неколку, според мене, интересни моменти. Прво што се забележува на фотографиите се насмеани лица на играорците, било да се тоа фотографии од настапи, проби или неформални, групни, истакна Андонов.
Во монографијата посебно се одделени манифестациите коишто Здружението ги има организирано по разни поводи, како што се поетски читања, театарски представи, настапи на естрадни уметници, проекции на филмови со што има оставено своевиден белег во културното живеење во градот. Една од активностите којашто Здружението активно и мошне упешно ги спроведува цели 30 години се хуманитарните акции кои секако заслужија да бидат ставени во посебно поглавје.
Здружението е присутно и на одбележувања на значајни празници и датуми кои се од голема важност како за македонскиот, така и за српскиот народ. На ваквите одбележувања Здружението е присутно како учесник или организатор