Најверојатно меѓу стотиците вработени во Министерството за образование нема никој да отвори предмет Македон, за да ова дете-гениј добие некоја поголема поддршка како талентиран ученик со натпросечна интелигенција.
Министерството не даде конкретен одговор дали некој ќе го бара таткото на Македон и со што точно можат навистина да му помогнат. Испратија една долга листа на можности, кои наликуваат на делови од веќе познати за јавноста општи стратегии, планови и програми развој на образованието.
Така велат дека талентираните ученици со одлука на Наставнички совет можат да напредуваат и забрзано, но најмногу до два пати за време на школувањето да преминат во наредно одделение, За учениците со натпросечна интелигенција се организираат и додатни активности, односно следуваат дополнителни бенефиции.
Од пред две години Математичко – информатичка гимназија во Скопје се нуди како специјализирано училиште за талентирани ученици во математиката, физиката и информатиката. Според Министерството, за развој на таленитирани ученици државата помага со разни видови стипендии и надоместоци, а повторно имаат ветување дека ќе се унапредат политиките за поддршка на талентирани ученици.
Од кабинетот на претседателот велат дека Пендаровски ќе се заложи кај министерот за образование за обезбедување поддршка за Македон, со цел да може успешно да го продолжи своето образование и развој како млад талент.
Уште во мај кога Македонија дозна за успесите и генијалноста на Македон, наставниот кадар предупреди-треба да се поддржат талентираните деца. Инаку ќе заминат во странство.
-Во моето долгогодишно работење како професор сум имала талентирани деца, вакви не. Пример од област на јазикот и така. Сум ги насочувала и голем дел од нив токму тоа го одбрале како идна професија. Овде се работи за нешто исклучително, и мене многу мие жал затоа што ваквите исклучителни деца секој пат ќе ни завршат во странство затоа што другите држави умеат да го препознаат и да го вреднуваат нечиј ум, изјави професорката Ружа Ѓорѓевска.
Македон веќе во раце има три светски златни медали на натпреварите по математика. Ако не се смени ништо во односот на државата кон него, дефинитивно тој нема повеќе да го носи светот тука, туку ќе го побара самиот да го освои.
Александар Самарџиев
