Делегација на Сојузот на борци од Тетово, претставници на семејствата, партии, организации и други денес со положување на цвеќе одбележа 78 години од загинувањето на 19 тетовски партизани во 1944 година. Седумнаесет од нив се убиени во мавровското село Беличица, а двајца два дена подоцна на 21 септември во дворот од црквата Свети Никола. Одбележувањето се одржа пред нивните спомен обележја во дворот од црквата.
– По настаните во село Беличица кои се случија на 19 Септември 1944 г. се случи уште едно ѕверство од страна на фашистичките слуги на окупаторот. После невидениот масакр и палењето на селото, во борбите во селото Беличица, беа заробени и подоцна по наредба на злосторникот Џемо Хаса, пред присилно насобраните тетовчани беа стрелани тројца борци од Третиот тетовски партизански одред, Андреа Христоски – Шварц, Младен Симоски – Требош, додека Сретен Тофилоски, иако ранет со девет куршуми, не им подлегнал на повредите и бил помилуван. Настаните, кои се случиле во село Беличица, треба да нè потсетуваат и истовремено да нè опоменуваат нас, но и идните генерации на црнилата на фашизмот и страдањата кои тој ги носи, порачаа од Сојузот на борците.
Во мавровското село Беличица во 1944 година биле убиени и 17 жители на селото меѓу кои жени и деца.
