Рано утринава двајца печалбари кои дошле од Германија и Швајварија се приведени, откако кај едниот била најдена дрога, а другиот го нарушил јавниот ред и мир со автомобилот. Во 04.10 часот на ул.„Илинденска“ во Тетово е приведен 21 годишник со живеалиште во Сојузна Република Германија.
-Полициски службеници од СВР Тетово го лишиле од слобода Ф.Џ.(21) од Тетово, со живеалиште во Сојузна Република Германија, затоа што при преглед во возилото „бмв“ со тетовски регистарски ознаки, кое го управувал, биле пронајдени и одземени марихуана и дробилка. Тој бил задржан во полициска станица и по целосно документирање на случајот против него ќе биде поднесен соодветен поднесок, информираат од СВР Тетово.
Дваесетина минути подоцна на истата улица приведен е 23 годишник од Тетово со времено живеалиште во Швајцарија кој со возилото бил затекнат како создава бучава.
-Од А.М.(23) од Тетово, со привремено живеалиште во Швајцарија, полициски службеници одзеле патничко возило „бмв“ со швајцарски национални ознаки затоа што со возилото го нарушил јавниот ред и мир, односно бил затекнат при зголемување на бучавата на возилото и нагло зголемување на брзината со чкрипење на пневматиците, информираат од СВР Тетово.
Според полицијата возилото било задржано за вонреден технички преглед и по документирање на случајот против него ќе биде поднесена соодветна пријава.