Во времето за пауза од 10 до 10 часот и 30 минути денеска синдикалната организација на Клиничката болница Тетово, Здравствен дом Тетово, Центар за јавно здравје денеска одржа полчасовен протест.
Самостојниот синдикат за здравство, фармација и социјална заштита го организираше протестот, а го поддржаа речиси сите доктори и другиот медицински персонал од овие здравствени установи.
-Денеска излеговме на протест поради доцнењето на платата што беше само капка која ја прели чашата на незадоволството во здравството. Незадоволни сме поради сé уште не потпишаниот анекс на колективниот договор за покачување на платите. Денеска протестираме и за неисплатата на К-15 бидејќи за здравството повторно нема исплата, протестираме и за непотпишувањето на новиот Колективен договор со кој треба да се унапредат правата на здравствените работници. Денеска исто така денеска излеговме да протестираме за достоинството на здравствените работници, а против навредливиот однос на Министерството за здравство и Владата кон здравствените работници. Денеска излеговме за да нé видат дека ние сме тука и ние постоиме- изјави Слободанка Грнчаровска, претседател на Синдикалната организација.
Тетовските лекари и друг медицински персонал велат дека иако платата им е пуштена вчера, не е во ред цел месец да останат без пари и дека платата сé уште не е исплатена во сите медицински установи во државата.
фото Зоран Андонов
