Овој Бадник, утре, петок, 6 јануари придружете се на Бадниковата литургија, Бадниковата поворка и прослава на тетовскиот плоштад, повикува одборот за обединета и сплотена прослава. Заинтересираните родители нивните деца може да ги донесат во соборната црква Свети Кирил и Методиј.
Празнувањето започнува утре во соборниот храм Свети Кирил и Методиј од 07:30 часот до 10:00 часот при што ќе биде отслужена Света Бадникова литургија, а од 10:15 тргнува Бадниковата литија.
Поворката ќе започне од јужната порта на црковниот двор и ќе се движи кон плошадот. Од кружниот тек кај плоштадот ќе се продолжи по булевар „Маршал Тито“ до градскиот пазар, а потоа по булевар „Благоја Тоска“ па се до трговскиот комплекс „Тетовчанка“. Од таму, назад по булеварот до улица „Борис Кидрич, покрај Дом на АРМ, позади Центар за култура и назад на плоштадот. На плоштадот е предвидено да има концерт на тетовското трио Шербет и пригодно здравичарско обраќање на Дарко Гавровски – Гавро.
-Од оваа година започнуваме со прекрасна традиција: после Бадниковата поворка ќе следи, за првпат и масовна сенародна Бадникова прослава на тетовскиот Плоштад. Овој настан е со благослов на Митрополитот Тетовско-гостиварски г. Јосиф. Се повикуваат сите благочестиви христијани, во петок да присуствуваат на настанот. Се повикуваат сите тетовчани и сопствениците на кафулиња да излезат на улиците за да ги пречекаат децата со скромни дарови.Се повикуваат сите луѓе со добра волја да бидат дел од поворката, а нивните деца напред. Дечињата ќе ја носат витлеемската пештера со Богомладенецот и ќе ја пеат песната „Вечниот Бог“.Да го прославиме, обединети пред Бога, сите тетовчани заедно навестувањето на Христовото Раѓање, пред Витлеемската ноќ и заедно со ангелите да пееме: „Слава на Бога во Висините, а на земјата мир и меѓу луѓето добра волја!, порачаа од Одборот за оваа прослава.
Воедно, на социјалните медиуми верниците се повикуваат на градскиот плоштад од 18 часот на заедничко народно традиционално чествување по повод Бадник согласно кое децата се маскираат и ја пеат песната „Бдња Баба“.
Во Тетово прв пат се одржа бадникова литија во 2017 година, а не се одржа во 2021 и 2022 поради пандемијата.
